وزیر اعظم شہباز شریف نے کہا کہ معرکہ حق میں کامیابی کے بعد پاکستانی لڑاکا طیاروں کی عالمی سطح پر مانگ میں اضافہ ہوا ہے۔ جے ایف‑17 تھنڈر طیاروں کے لیے کئی ممالک مذاکرات کر رہے ہیں۔
اسلام آباد: وزیر اعظم شہباز شریف نے حال ہی میں کہا ہے کہ معرکہ حق میں پاکستان کی کامیابی کے بعد ہماری لڑاکا طیاروں کی بین الاقوامی سطح پر مانگ میں اضافہ ہوا ہے۔ انہوں نے کہا کہ مختلف ممالک پاکستانی طیاروں کے حصول میں دلچسپی لے رہے ہیں، جو ملکی معیشت اور دفاعی صنعت کے لیے خوش آئند خبر ہے۔
وزیر اعظم نے کابینہ اجلاس میں بتایا کہ دشمن کے خلاف کامیابی نے پاکستان کی دفاعی صنعت کی ساکھ کو مضبوط کیا ہے۔ انہوں نے کہا کہ پاکستانی طیارے اب عالمی مارکیٹ میں ایک قابل اعتماد آپشن کے طور پر دیکھے جا رہے ہیں، اور کئی ممالک نے اس حوالے سے سنجیدہ بات چیت شروع کر دی ہے۔
انہوں نے یہ بھی واضح کیا کہ ملک کی سکیورٹی فورسز ہر سطح پر کام کر رہی ہیں اور دہشت گردی کے خاتمے کے لیے مسلسل اقدامات جاری ہیں۔ وزیر اعظم نے معیشت میں بہتری اور تعلیمی شعبے میں نئے منصوبوں کا ذکر بھی کیا۔
بین الاقوامی ذرائع کے مطابق پاکستان خاص طور پر جے ایف‑17 تھنڈر طیاروں کی فروخت کے سلسلے میں مختلف ممالک کے ساتھ مذاکرات کر رہا ہے۔ اس اقدام سے نہ صرف ملکی دفاع مضبوط ہوگا بلکہ برآمدات میں بھی اضافہ ممکن ہے، جس سے معیشت پر مثبت اثرات مرتب ہوں گے۔
ہمارا وٹس ایپ چینل کو جوائن کریں