سری لنکا کے 1996 کرکٹ ورلڈ کپ کے فاتح کپتان اور سابق وزیرِ پٹرولیم ارجنا راناٹنگا ایک سنگین بدعنوانی کیس میں گرفتاری کے دہانے پر پہنچ گئے ہیں۔ سری لنکن حکام نے عدالت کو آگاہ کیا ہے کہ راناٹنگا اس وقت بیرونِ ملک موجود ہیں اور وطن واپسی پر انہیں حراست میں لے لیا جائے گا۔
بھارتی میڈیا رپورٹس کے مطابق
بھارتی میڈیا رپورٹس کے مطابق پیر کے روز سری لنکا کے بدعنوانی پر نظر رکھنے والے ادارے کمیشن ٹو انویسٹی گیٹ الیگیشنز آف برائبری یا کرپشن (CIABOC) نے کولمبو کی عدالت کو بتایا کہ ارجنا راناٹنگا کے خلاف ان کے وزارتِ پٹرولیم کے دور سے متعلق کرپشن کے الزامات پر کارروائی مکمل مراحل میں ہے۔
کمیشن کے مطابق
کمیشن کے مطابق راناٹنگا اور ان کے بھائی پر الزام ہے کہ انہوں نے طویل المدتی تیل کی خریداری کے معاہدوں کے طریقۂ کار میں غیرقانونی تبدیلیاں کیں اور زیادہ مہنگی اسپاٹ خریداری کو ترجیح دی، جس سے ریاستی خزانے کو بھاری نقصان پہنچا۔
تحقیقات میں سامنے آیا ہے کہ 2017 میں کیے گئے 27 سودوں کے نتیجے میں سری لنکن ریاست کو 800 ملین سری لنکن روپے کا نقصان ہوا، جو اُس وقت کے حساب سے 50 لاکھ امریکی ڈالر سے زائد بنتا ہے۔ کمیشن نے مجسٹریٹ آسانگا بوداراگاما کو آگاہ کیا کہ راناٹنگا کی بیرونِ ملک موجودگی کے باعث فوری گرفتاری ممکن نہیں، تاہم واپسی پر قانونی کارروائی عمل میں لائی جائے گی۔
یہ پیش رفت سری لنکا میں سیاست اور کرکٹ کے سنگم پر کھڑے ایک بڑے نام کے لیے نہایت نازک موڑ سمجھی جا رہی ہے، جہاں قومی ہیرو کی حیثیت رکھنے والا سابق کپتان اب قانون کے کٹہرے میں نظر آتا ہے۔