راولپنڈی: راولپنڈی میں ایک افسوسناک واقعے کے دوران خاتون ایڈیشنل ڈپٹی کمشنر پر مبینہ تشدد کے الزام میں ان کے شوہر کو گرفتار کر کے جوڈیشل ریمانڈ پر جیل بھیج دیا گیا ہے۔

تفصیلات کے مطابق، ایڈیشنل ڈپٹی کمشنر ملیحہ سحر نے اپنے شوہر جواد علی پر گھریلو تشدد کا الزام عائد کیا تھا۔ خاتون افسر کی مدعیت اور درخواست پر ملزم کے خلاف تھانہ ویمن پولیس میں باقاعدہ مقدمہ درج کیا گیا تھا۔

پولیس نے فوری کارروائی کرتے ہوئے ایڈیشنل ڈپٹی کمشنر کے شوہر جواد علی کو گرفتار کیا اور تفتیش کے بعد عدالت میں پیش کیا۔ عدالت نے دونوں فریقین کے دلائل سننے کے بعد ملزم جواد علی کو 14 روز کے لیے جوڈیشل ریمانڈ پر جیل بھیج دیا۔

پولیس حکام کا کہنا ہے کہ کیس کے حوالے سے مزید قانونی کارروائی جاری ہے اور شواہد کی روشنی میں تمام پہلوؤں کا جائزہ لیا جا رہا ہے۔