گورنر پنجاب سردار سلیم حیدر خان نے اپنی استاد کی گورنر ہاؤس لاہور آمد پر بے حد خوشی کا اظہار کرتے ہوئے انہیں احتراماً اپنی کرسی پر بٹھایا اور ان کے ساتھ والہانہ محبت و عقیدت کا مظاہرہ کیا۔

“استاد صرف استاد نہیں، والدین کی طرح ہوتے ہیں”

اس جذباتی اور پروقار موقع پر گفتگو کرتے ہوئے گورنر پنجاب نے کہا کہ استاد صرف علم دینے والی ہستی نہیں بلکہ والدین کا درجہ رکھتے ہیں۔ استاد کی دی ہوئی تربیت ہی انسان کی شخصیت اور عملی زندگی کو سنوارتی ہے، اسی لیے اساتذہ کا احترام ہم سب پر فرض اور لازمی ہے۔

تربیت اور شعورِ زندگی کا محور

سردار سلیم حیدر خان نے مزید کہا کہ کوئی بھی انسان زندگی میں کسی بھی اعلیٰ عہدے پر پہنچ جائے، وہ اپنے اساتذہ کی شفقت اور راہنمائی کا مقروض رہتا ہے۔ اساتذہ اپنی محنت، صلاحیت اور اخلاقی تربیت کے ذریعے بچوں کو زندگی میں آگے بڑھنے اور معاشرے کا مفید شہری بننے کی ہدایت فراہم کرتے ہیں۔