شہریوں کے لیے اہم ہدایات
پاکستان نے ایران کی موجودہ صورتحال کے پیش نظر اپنے شہریوں کے لیے ٹریول ایڈوائزری جاری کر دی ہے۔ دفتر خارجہ کے ترجمان کے مطابق حالات بہتر ہونے تک ایران کا غیر ضروری سفر نہ کیا جائے، جبکہ وہاں موجود پاکستانی شہری مکمل احتیاط اور ہوشیاری اختیار کریں۔
ترجمان کا کہنا ہے کہ ایران میں سکیورٹی صورتحال غیر یقینی ہے، اس لیے عام شہریوں کو بلا ضرورت سفر سے گریز کرنا چاہیے۔ جو پاکستانی پہلے سے ایران میں موجود ہیں، وہ اپنی نقل و حرکت محدود رکھیں اور ہر وقت حالات پر نظر رکھیں۔
ایڈوائزری میں یہ بھی واضح کیا گیا ہے کہ ایران میں موجود پاکستانی شہری اپنے قریبی پاکستانی مشنز سے مسلسل رابطے میں رہیں۔ کسی بھی ہنگامی صورتحال میں فوری طور پر سفارتی عملے کو آگاہ کریں تاکہ بروقت مدد فراہم کی جا سکے۔
دفتر خارجہ کی جانب سے ایران میں موجود پاکستانی سفارتخانے تہران کے علاوہ زاہدان اور مشہد میں قائم مشنز کے رابطہ نمبر بھی جاری کر دیے گئے ہیں۔ شہریوں کو ہدایت دی گئی ہے کہ یہ نمبر اپنے پاس محفوظ رکھیں اور ضرورت پڑنے پر استعمال کریں۔
حکومت پاکستان صورتحال پر گہری نظر رکھے ہوئے ہے اور شہریوں کی سلامتی اولین ترجیح ہے۔ نئی پیش رفت کی صورت میں مزید ہدایات جاری کی جائیں گی۔